Diasabra anochi a tuma lugar na Bonchincha un anochi special di Roadmarch y Calypso festival, di cual e popular bandanan The Musical Time y NBO a compaña varios artistanan di Roadmarch y Calypso. Durante e anochi publico por a disfruta di varios cancionan clasico di nos carnaval.
Loke a haci e anochi aki mas grandi y bira algo nacional ta na momento cu PowerFM y Diario TV Canal 48 a anuncia cu nan lo transmit full e festival aki pa pueblo por sinti e momento unico cu e artistanan a presenta riba scenario.
E anochi a wordo dedica na Roberto Geerman den feliz memoria Clauduis Phillips the king of kings y tambe na Ruben Scorpio Garcia. Ruben tabata maestro di ceremonia y riba stage a haya sa cu e festival ta dedica na dje tambe.
Mighty Campo y Ruben a dirigi e anochi aki den un forma sublime cu a laga hopi di nos sinti cu ta den Carnival village mes nos ta. Nos minister di Finansa y Cultura Xiomara Maduro tambe tabata te’y henter e anochi pa apoya cada un artista.
Un pabien na e organisardoan, Diario TV cu a transmiti esaki via television y facebook y tambe na e ekipo di Power FM.
Gobierno a elemina casi tur medida recientemente di cual ta haci cu bandanan por toca completo atrobe y bailamente na lugar publico ta permiti un bez mas.
Nos ta sinti cu poco poco Aruba y mundo ta poniendo tur medida tras di lomba y drenta bek e normalidad.
Mundo no por sigui den pandemia pa largo mas, e final ta mustra cu ta yegando.
(Photo Credit Darren van Ommeren facebook page)
Comments